Муус устар 19 күнүгэр “ЭТЭР БЭС» оройуоннааҕы холбоһук медиа бөлөх буолан ыраах сытар Чыкаалап нэһилиэгэр баран кэллибит. «ЭТЭР БЭС» медиа бөлөх бу сыл саҕана тэриллэн Ньурба улууһун историятын, дьоннорун арыйан, ахтыы хомуйан үлэлии сылдьар.
“Этэр бэс” биир өттүнэн этэр мас диэн лабаата бу биһиги төһө хайысханы хабан олорорбутун бэлиэтэ. Биир өттүнэн этэрбэс радио диэн дьон кэпсээнэ.
Бу бөлөххө Ньурба улууһун эдэр учууталлара Одун Аман Виктор уола, Иванова Милена Прокопьевна уонна Тобонова Сандаара Игоревна оҕолору илдьэ сылдьан үөрэтэллэр, дойдуларын атын өттүттэн арыйаллар, көрдөрөллөр.Маҥнайгы биэриибит –Сата уустарыгар, Арыйаан Ууска анаммыта.Бу сырыыга улахан хамаандалаах саха ынахтарын көрө уонна Чыкаалап кэрэ айылҕатын, дьонун-сэргэтин кытта билсэ айаҥҥа туруммуппут.Чыкаалапка баран иһэн Акана орто оскуолатын түмэлигэр ыалдьыттаатыбыт. Түмэл үлэһитэ Агафья Семеновна нэһилиэк историятын, биллэр дьоннорун кэпсээбитэ. Чыкаалапка саха ынахтара көрүстүлэр.
ГКП «Саха сүөһүтэ» үлэһиттэрэ хотоннорун, саҥа төрөөбүт тарбыйахтары уонна үлэлэрин туһунан билиһиннэрдилэр. Саха ынахтара олус көрсүө, чычаас эбиттэр. Кырачаан сүүрбэттэн тахса тарбыйахтары көрөн олус долгуйбуппут, үөрбүппүт.Оҕолор тарбыйахтары көтөҕөн көрбүттэрэ, ыйааһыннара чэпчэки. Үлэһиттэри кытта кэпсэппиппит. Сотору сайылыкка көһүү буолар. Чыкаалап ытык кырдьаҕаһа Тимофеева Аграфена Даниловна олоҕун бэлиэ түгэннэрин уонна тапталлаах дойдутун туһунан ахтыы биэрдэ. Зинаида Васильевна нэһилиэк историятын туһунан сырдатта. Ону таһынан нэһилиэк олохтоохторугар кэнсиэрт, ахтылҕан биэчэрин тэрийдибит. Ытык кырдьаҕастарбыт сүбэлэрин, алгстарын ылан дуоһуйа астынныбыт, сынньанныбыт.Чыкаалапка төһө да аҕыйах ыал олордор, манна олох уста турар. Соҕотохсуйбут дьиэлэр сайыны күүтэллэр. “Сайын дьон элбиир, дойдуларыгар сайылааччылар элбэхтэр”, — дииллэр олохтоохтор.Махталбытын биллэрэбит ГКП “Саха сүөһүтэ” үлэһиттэригэр, салайааччы Андрей Владимировичка, Акана орто оскуолатыгар, Хаҥалас кыраайы үөрэтэр түмэлин салайааччытыгар Анисимова Зинаида Васильевнаҕа уонна Чыкаалап көрсүө-сэмэй олохтоохторугар. Бу маннык сырыылар оҕолорго төрөөбүт дойдуларыгар бэриниилээх буоларга, тапталы иҥэриэ диэн эрэллээхпит.
